Detaje të reja kanë dalë mbi vdekjen e 28- vjeçares shtatzënë, Emanuela Dalipi, e infektuar nga koronavirusi.
Familjarët kanë thënë jashtë kamerave për News 24 se e reja 5-muajshe shtatzënë, para një muaji kishte kryer një ndërhyrje në dhëmballë, ndërsa më vonë ka patur dhimbje të vazhdueshme koke.
28- vjeçarja i është drejtuar një klinike private për dhimbjet e kokës dhe prej asaj dite i janë shfaqur edhe problemet me frymëmarrjen.
“E reja ishte 5-muajshe shtatzënë. Para një muaji kishte pasur një ndërhyrje në një dhëmballë, dhe prej asaj kohe ka pasur dhimbje të vazhdueshme koke. Ka shkuar në një klinikë private dhe ka bërë një vizitë për dhimbjet e kokës, ku menjëherë më pas i janë shfaqur edhe problemet me frymëmarrjen. Ajo ka shkuar sërish për vizitë dhe mjeku i ka dhënë mjekim për astmë. Kjo ja ka vështirësuar edhe më shumë gjendjen shëndetësore. Pastaj ajo është drejtuar drejt spitalit Covid-1, ku është trajtuar për një javë” thonë familjarët.
Gjithashtu, familjarët kanë treguar se për shkak të shtatzënisë e reja kishte vështirësi në trajtimin me medikamente. Mjekët tentuan të shpëtonin foshnjën me anë të ndërhyrjes së menjëhershme, por 28-vjeçares i nisi hemorragjia dhe e futën me urgjencë në reanimacion. Kështu tentativa e mjekëve për të mbajtur në jetë foshnjën dhe nënën dështoi.
“Katër ditët e para ka qenë në dhomat e spitalit, por duke qenë se ishte dhe shtatzënë kishte vështirësi në trajtimin e saj, pasi ilaçet ndikonin te shtatzënia. Vajza kishte edhe anoreksi, nuk hante. Për këtë, ajo është futur në operacion për t’i nxjerrë fëmijë nga barku, pasi vështirësohej jeta e të dyve. Dy ditë më parë ajo është futur në operacion, ku fëmija i ka lindur i vdekur”.
Pas humbjes së foshnjës, familjarët e 28-vjeçares janë shprehur se ajo nuk ka luftuar për jetën, duke u dorëzuar.
Ndërsa, Artenis Dalipi, bashkëshorti i 28-vjeçares Emanuela Dalipi, thotë në një prononcim për mediat se mjekët e spitalit Infektiv kanë bërë gjithçka kanë mundur për ta mbajtur në jetë.
“Jemi prej 5 vitesh të martuar. Emanuela punonte në një qendër kozmetike, unë punoj tek ish-parku i autobuzave. Para dy javësh iu shfaqën simptomat, e mbajtëm në shtëpi, por gjendja u përkeqësua. U detyruam ta dërgonim tek Infektivi, mjekët bënë gjithçka por nuk ia dolën ta mbanin në jetë. Ka vdekur dje, sot e sollëm në banesën e prindërve të saj për pak orë dhe pastaj e nisëm për në banesën e fundit. Nuk duam të flasim para kamerave, është një fatkeqësi që na ka ndodhur, familja e saj është përballur edhe para 3 vitesh me vdekje tjetër, kushërirës së Emanuelës. Vdiq për shkak të sasisë së madhe të anestezisë për operacionin në gju që po bënte në një spital privat. Prindërit e saj janë trishtuar, s’di ç’të themi më tepër“, tha ai./Opinion.al
