Detaje të reja kanë dalë nga atentati që tronditi kryeqytetin mbrëmjen e djeshme, ku u vra Erion Çela dhe u plagosën 4 persona të tjerë, përfshirë dhe vëllain e tij. Klan News raporton se sipas grupit hetimor, dyshohet që objektiv i sulmit me armë të ketë qenë Edmond Crroj, daja i dy vëllezërve Çela, viktimës Erion dhe të plagosurit Blerim.
Hetuesit dyshojnë se autorët e kanë ndjekur prej kohësh Edmond Crrojn dhe kanë pritur momentin e duhur për ta sulmuar me armë kur të ndodhej së bashku me dy nipërit e tij. Crroj rezulton me precedent të theksuar kriminal jashtë vendit, ku është akzuar në Itali për trafik droge.
Të plagosur në atentat përveç, Blerim Çelës dhe Edmond Crrojt mbetën dhe Arben Dani dhe 19 vjeçarit Azbi Selimaj.
Të 4 të plagosurit ndodhen në Spitalin e Traumës për ndihmë mjekësore. Dëshmia e dy prej tyre nuk ka ndihmuar shumë grupin hetimor. As në vendin e ngjarjes nuk është gjetur asnjë gëzhojë, çka do të thotë se autori ka qëlluar nga brenda makinës duke mos lënë prova në vendngjarje.
Do të jenë kamerat e sigurisë që pritet të ndihmojnë grupin hetimor për të zbardhur dinamikën e vrasjes dhe itinerarin e lëvizjes së atentatorëve.
Ngjarja e rëndë ndodhi rreth orës 16:15 të mbrëmjes së djeshme në një lokal në “Don Bosko”. Autorët kanë ardhur nga spitali i Traumës drejt lokalit me një makinë tip Mercedez Benz E-Class me targa AA 125 UK i zi, të cilat dyshohet se i janë vjedhur një Smart-i dhe kanë qëlluar nga makina në lëvizje me breshëri kallashnikovi në drejtim të tavolinës ku ishte ulur viktima dhe personat e tjerë dhe më pas janë larguar me shpejtësi nga vendi i ngjarjes./Opinion.al
