Dorjan Shtjefni 30 vjeç ka mbetur i plagosur pas atentatit të mbrëmshëm në qendër të Shkodrës. Dy automjete i kanë zënë rrugën dhe kanë qëlluar në drejtim të mjetit. Vetëm pak minuta nga kjo ngjarje një aksident automobilistik me pasojë plagosjen e tre personave ka ndodhur në vendin e quajtur Stom Golem, në afërsi të varrezave të qytetit në drejtim të fshatit Grudë e Re.
Hetimet paraprake dhe burimet policore kanë dyshime se personat në mjet kishin të bënin me atenatin në qendër të Shkodrës. Si shkak i shpejtësisë së mjetit me qëllim humbjen e gjurmëve kanë humbur kontrollin dhe janë përplasur me një motorikletë. Po sipas burimeve policore mësohet se njëri nga personat e aksidentuar është i plagosur me armë zjarri, pasi mes tyre dhe Dorian Shtjefnit në momentin e pritës ka pasur shkëmbim zjarri.
Policia ka dyshime të forta se të aksidentuarit janë pjesë e ngjarjes së ndodhur në qendër të Shkodrës, pasi në vendin e aksidentit policia ka gjetur edhe një krëhër automatiku me fishekë. Policia nuk bën të ditura të dhënat rreth pistave që po heton dhe se cilat kanë qenë shkaqet e atenatit ndaj 30-vjeçarit, ndërsa mësohet se po heton rreth konflikteve të mëparshme që 30 – vjeçari mund të ketë pasur me persona të tjerë./tvklan.al
