“Kontratës së koncesionit të sterilizimit iu rrit kosto me 56.4%.”
Në këtë përfundim ka dalë SPAK pas hetimeve të kryera lidhur me këtë koncesion që çoi në burg ish-zëvendës ministrin e Shëndetësisë, Klodjan Rjepaj, biznesmenin Ilir Rrapaj si dhe la në “arrest shtëpie” e “detyrim paraqitje” 6 zyrtarë të tjerë.
Tv Klan ka siguruar dosjen hetimore të Prokurorisë së Posaçme, në të cilën ndër të tjera thuhet se në koston e shërbimit janë përfshirë barna dhe materiale mjekësore. Sipas SPAK këto të fundit nuk janë pjesë e kontratës së shërbimit.
Pa kryerjen e analizës teknike dhe ekonomike financiare të saktë me elementet reale përbërëse të tyre, është bërë arsyetimi i vendimit koncensionit/PPP, duke llogaritur në koston e shërbimeve të QSUT-së vlerën 502 233 399 Lekë, ku në këtë vlerë 283 287 369Lekë ose 56.4% e saj janë barna dhe materiale mjekësore që nuk janë pjesë e shërbimit. Të dhënat e pasqyrave financiare nuk janë përshkruar dhe analizuar në studimin e fizibilitetit. Pra në krahasuesin e sektorit publik është fryrë në mënyrë fiktive kostoja e sterilizimit në masën 56.4%.
Në dosjen e SPAK gjithashtu thuhet se është sekuestruar posta elektronike e biznesmenit Rrapaj ku janë zbuluar komunikime me ish-zëvendës ministrin Rjepaj lidhur me studimet e fizibilitetit që më pas u përfshinë në kontratën e koncesionit.
Teksa rendit provat dhe dokumentat e sekuestruara, Prokuroria e Posaçme thotë se nuk ka mundur të gjejë kontratën origjinale të koncesionit të sterilizimit, por vetëm kopjen e njehsuar të origjinalit.
Lidhur me koncesionin e sterilizimit krahas 8 të akuzuarve, SPAK ka në verifikim edhe 6 ish zyrtarë të tjerë për akuzat e shpërdorimit të detyrës, falsifikimit të dokumenteve dhe mashtrimit me pasoja të rënda.
