Ronida Hysi është infermierja, e cila grabiti pacientin e shtruar tek spitali COVID I, teksa aktualisht është nën masën e sigurisë “arrest me burg” deri në përfundim të hetimeve.
Ndërkaq, sipas ABCNews në dosjen hetimore të prokurorisë shpjegohet me detaje se si u zbulua se ishte pikërisht e reja që i kishte zbrazur llogarinë pacientit që ndërroi jetë nga koronavirusi.
Kanë qenë kamerat e sigurisë ato të cilat kanë “tradhtuar” Hysin, teksa e kanë kapur në orën 08:00 të mëngjesit të datës 25 dhjetor në një bankomat pranë QSUT.
“Një vajzë me flokë të kapura, që kishte probleme me të ecurën në këmbën e majtë që kishte kryer veprime me kartën e pacientit Kamber D,”- thuhet ndër të tjera në dojen hetimore.
Nisur nga kjo, prokurorët kanë administruar pamjet e kamerave të sigurisë së spitalit Infektiv ku në orën 07:53 duket duke dalë nga ambientet e spitalit e njëjta vajzë që është parë 7 minuta më vonë tek bankomati në QSUT. Pasi kanë bërë krahasimet dhe kanë marrë regjistrimin e personave që ishin në shërbim në turnin e tretë tek Infektivi gjatë natës së datës 24 dhjetor, prokurorët kanë konstatuar se e dyshuara ishte pikërisht Ronida Hysi.
Gjithashtu pretendohet në dosje, se kur është marrë në pyetje, infermierja Ronida Hysi nuk ka mohuar përdorimin e kartës së pacientit duke thënë se portofolin e kishte gjetur në ashensorin e repartit Infektiv gjatë punës ku aty brenda ishte edhe kodi PIN.
Kujtojmë që edhe avokati i saj mbrojës, e ka mbrojtur klientin e tij para trupës gjyqësore me pretekstin se Hysi e kishte gjetur portofolin dhe nuk e kishte vjedhur./Opinion.al
