Koha është konsideruar nga ekspertët një element i rëndësishëm për të zbardhur rrethanat e vrasjes së 25-vjeçarit Klodian Rasha, nga efektivi i policisë Nebaldo Hajdaraj.
Gazetarja Klodiana Lala ka publikuar detaje nga dosja hetimore, ndërsa ka bërë të ditur se nga momenti që patrulla ka njoftuar sallën operative për ndjekjen e një personi, deri në momentin që është kërkuar ambulanca kanë kaluar vetëm 3 minuta.
“Njoftimi në sallë operativen është dhënë në orën 01:09 minuta të datës 8 dhjetor. Patrulla ka njoftuar se po ndiqnte një person, ndërsa 3 minuta më pas kanë kërkuar ambulancën, po pa dhënë arsye pse e kërkojnë. Në orën 01.14 minuta, është njoftuar në sallë përdorimi i armës së zjarrit nga punonjësi i policisë. 25-vjeçari është çuar në spital dhe mjekët kanë thënë se personi është i pajetë. Në orën 01 e 23 minuta 25 vjecari është shpallur i vdekur”, ka thënë Lala.
Ndërkohë kamera e trupit të policit ka qenë inaktive. Sikurse gazetari Spartak Koka ka bërë të ditur një natë më parë në emisionin “Opinion”, kjo ka ndodhur sepse kontrata e kompanisë që merret me mirëmbajtjen e kamerave ka përfunduar.
Për këtë arsye mësohet se prokuroria është duke mbledhur pamjet filmime të kamerave të sigurisë në bizneset pranë zonës. Deri tani tani janë mbledhur kamerat e 5 bizneseve dhe janë marr shenjat e gishtërinjve të viktimës për të ekzaminuar nëse arma e gjetur 200 metër larg vendngjarjes i përket 25 vjeçarit./Opinion.al
