Policia e Vlorës ka arrestuar ish-drejtorin e Kadastrës së qytetit të Vlorës Klodian Troci. Në një njoftim zyrtar, bëhet me dije se gjatë kontrollit të shtëpisë në Tiranë, janë gjetur 65.000 euro.
“Nga specialistët për Hetimin e Krimit Ekonomik dhe Financiar në DVP Vlorë, u bë ekzekutimi i vendimit të datës 16.10.2021, i Gjykates së Shkallës së Parë Vlorë, e cila ka caktuar masën e sigurimit personal “Arrest në burg” për shtetasin K. T., 33 vjeç, banues në Vlorë, për veprat penale “Shpërdorim i detyrës” dhe “Falsifikim i vulave, i stampave ose i formularëve”.
Gjithashtu gjatë kontrollit të banesës, në Tiranë, shtetasit K. T, i është gjetur një shumë parash prej 65.000 Euro, të cilat u sekuestruan në cilësinë e provës materiale. Materialet i kaluan Prokurorisë pranë Gjykatës së Shkallës së Parë Vlorë, për veprime të mëtejshme”, njofton Policia.
Klodian Troci akuzohet se është pjesë e grupit që falsifikonin dokumentet e pronave në Dhërmi./Opinion.al
