Dy të vdekur dhe një i plagosur. Ky është bilanci i një atentati mafioz të ndodhur në qytetin bregdetar të Vlorës, pak pas mesditës së kësaj të diele. Ngjarja ka ndodhur në zonën e “Ujit të Ftohtë”.
Opinion.al mëson se autorët kanë qëlluar nga një automjet dhe më pas janë larguar. Po ashtu mësohet se plumbat i kanë marrë jetën dy të rinjve Orest Rexho dhe Arjan Hasani, ndërsa i plagosur ka mbetur Armando Sulejmani.
Mësohet se i plagosur është transportuar për në spital dhe ndodhet në gjendje kritike për jetën. Një prej viktimave u gjet i pajetë brenda një makine të ndaluar, kurse viktima tjetër i shtrirë në rrugë. Ndërkohë, policia ka gjetur në fshatin Babicë një automjet në flakë, që dyshohet se është përdorur nga autorët.
Njoftimi i policisë
Pak minuta më parë në lagjen “Ujë i Ftohtë”, Vlorë, kanë mbetur të vrarë dyshohet me armë zjarri 2 shtetas dhe 1 tjetër u plagos, në rrethana ende të paqarta. Një grup i posaçëm hetimor u ngrit menjëherë dhe po punon për sqarimin e rrethanave dhe identifikimin e ndalimin e personave të implikuar në ngjarje. Për shkak të hetimeve nuk mund të bëhen të ditura detaje të tjera.
