Arabia Saudite më në fund e pranoi që Jamal Khashoggi vdiq brenda ambienteve të konsullatës. Tashmë ata kanë marrë urdhër të dorëzojnë trupin e gazetarit të vrarë. Protestuesit e të drejtave të njeriut kërkojnë të dinë se çfarë ndodhi, ndërsa hetuesit turq këmbëngulin se do të kenë në dorë prova për vrasjen e tij brenda pak ditësh.
Urdhri për të dorëzuar trupin erdhi pasi Arabia Saudite tha se gazetari vdiq gjatë një përleshje me grushta. Ai u përpoq të negocionte në Turqi por historia pati një fund të dhunshëm. Samah Hadid është drejtorja e Lindjes së Mesme për Amnisti Ndërkombëtare. Ajo i kërkoi Kombeve të Bashkuara të mundësojnë një hetim të pavarur.
Hadid tha: “Në 2 tetor Khashoggi hyri në konsullatën e Arabisë Saudite në Turqi për disa dokumenta, dhe nuk doli kurrë nga aty. Autoritetet saudite pretenduan se ai doli nga konsullata, por autoritetet turke raportuan se Khashoggi u vra brenda.” Hadid shtoi se pa një hetim të pavarur, nuk do të dalë kurrë në pah e vërteta për vdekjen e Jamal.
Zyrtarët turq thanë se Jamal Khashoggi është gjymtuar brenda konsullatës. Mbretëria nga ana tjetër ka mohuar përfshirjen në zhdukjen e disidentit saudit. Por ditën e djeshme, prokurori i çështjes publikoi faktin që Khashoggi vdiq gjatë një sherri me njerëzit brenda konsullatës. Deklarata thoshte se 18 burra u arrestuan për “fshehje të ngjarjes” dhe dy zyrtarë të vjetër janë shkarkuar.
Sipas burimeve, sauditët nuk e dinë ku ndodhet trupi pasi iu dha një bashkëpunëtori vendas për ta zhdukur. Policia turke ka zgjeruar kërkimin në një pyll aty pranë, ku besohet që mund të jetë hedhur trupi.
Hetuesit hamendësojnë se 15 burra kanë fluturuar nga Riadi në Stamboll me aviona privatë. Familja Mbretërore e Arabisë Saudite mendohet t’i ketë dërguar për të vrarë gazetarin./ E. Lika – Opinion.al
