Në kuadër të operacionit policor të koduar “Midnight” janë vënë në pranga babë e bir, banues në Tiranë. Konkretisht është arrestuar 37-vjeçari me iniciale R.Z. për veprat penale “armëmbajtja pa leje” dhe “prodhimi dhe shitja e narkotikëve” dhe babai i tij, 65-vjeçari me iniciale B.Z. për veprën penale “veprime që pengojnë zbulimin e së vërtetës”.
Në rrugën “Niko Avramo”, uniformat blu kanë ndaluar për kontroll automjetin me drejtues 37-vjeçarin, në të cilin kanë gjetur dhe sekuestruar një sasi kokaine. Në vijim të veprimeve gjatë kontrollit në banesën e tij, shërbimet e Policisë gjetën dhe sekuestruan 1 pistoletë, municion luftarak dhe kokainë e ndarë në doza, gati për shitje me peshë totale rreth 36 gramë.
Ndërsa babai i 37-vjeçarit, sapo ka parë shërbimet e Policisë, ka tentuar të hedhë lëndën narkotike në lavaman dhe të hedhë nga ballkoni armën e zjarrit. Materialet i kaluan Prokurorisë, për veprime të mëtejshme procedurale.
