Përpara pak javësh këngëtarja me origjinë shqiptare Rita Ora lajmëroi në rrjetet sociale një bashkëpunim me shqiptaren tjetër Bebe Rexha, dhe dy artistet e tjera Charli XCX e hitin e momentit Cardi B. Kënga me titull “Girls” u lançua përpara dy ditësh në Youtube dhe në platforma të tjera muzikore.
“Girls” është një këngë që katër artistet, me iniciativën e Rita Ora, u bashkuan për të shfaqur mbështetjen e plotë ndaj komunitetit LGBT, por mesa duket kanë dështuar në misionin e tyre. Në Youtube ka një lumë komentesh negative që vijnë kryesisht nga komunteti LGBT dhe i sulmojnë këngëtaret.
“Faleminderit që e kthyet seksualitetin tim në një shaka alkooli dhe një trend të ri. Dëgjoni Curious nga Hayley Kiyoko, lërini menjanë këto plehra,” shkruan një komentues.
“Jam shumë e zhgënjyer nga kënga për shumë arsye,” shkruan një tjetër duke mos lënë pa përmendur edhe muzikën e kompozimin, “50/50 nuk është mënyra e duhur për ta përshkruar një biseksual, dhe më pas vazhdon duke thënë se do të performonte seks oral me një vajzë nëse do kishte pirë verë të kuqe.”
Një komentues me nofkën deaddamian shkruan: “Kjo është e neveritshme. Në fillim Cardi shfaqet si homofobike, e pastaj këndon për biseksualitetin?? Së dyti, 50/50 është një stigmë e tmerrshme për biseksualitetin, e pastaj gërshëra???? Faleminderit që përforconi stereotipet me këtë këngë të tmerrshme.”
Të tjerë komentues përforcojnë idenë që kjo këngë i ka bërë të ndihen jo komod dhe nuk është aspak përshkrim i saktë i biseksualitetit./Opinion.al
