Kryedemokrati, Lulzim Basha ka folur për mediat pasi ka dhënë dëshminë në SPAK ku është pyetur nga prokurorët belgë për çështjen Toyota Yaris. Basha ka thënë se është pyetur për herë të dytë për këtë çështje dhe sa herë të jetë e nevojshme do bashkëpunojë me drejtësinë belge, apo të çdo vendi partner, në luftën kundër krimit të organizuar.
“Kam kënaqësinë që të jem përsëri në praninë e përfaqësuesve të drejtësisë belge, të cilët kanë konfirmuar edhe një herë të vërtetën dhe kanë hedhur poshtë gënjeshtrat. Çështja në Belgjikë nuk është mbyllur, siç ka ndodhur me çështjen këtu. Paratë mbeten të konfiskuara, drejtësia belge është e vendosur që t’i shkojë drejtësisë deri në fund. Për herë të dytë dhe sa herë të jetë e nevojshme do bashkëpunoj me drejtësinë belge, të çdo vendi partner, në luftën kundër krimit të organizuar dhe në veçanti për lidhjet e krimit të organizuar me politikën. E bëj me vetëdijen se ky është një mision që më përket jo vetëm mua por edhe PD-së”, tha Basha.
Më tej, Basha ka thënë se sot është pyetur në SPAK në rolin e personit që ka dijeni për ngjarjen.
“Ky është vetëm një proces që bëhet por të tillë ka shumë. Unë dhe PD në dispozicion të drejtësisë belge, kundër krimit dhe korrupsionit. Jam pyetur në rolin e personit që ka dijeni për ngjarjen”, tha Basha./Opinion.al
