Një tjetër person është arrestuar në vijim të operacionit “Porositësi”. Sipas policisë, bëhet fjalë për një 32-vjeçar nga Durrësi me inicialet Z. M.
32-vjeçari është autor i dyshuar për kryerjen e veprës penale “Prodhimi dhe mbajtja pa leje e armëve, armëve luftarake dhe e municionit”, në formën e grupit të strukturuar kriminal.
“Shërbimet e Forcës së Posaçme Operacionale të Drejtorisë Vendore të Policisë Durrës, në vijim të hetimeve të thelluara në bashkëpunim me Prokurorinë pranë Gjykatës së Rrethit Gjyqësor Durrës, në kuadër të operacionit “Porositësi”, mbështetur me inteligjencë operative, bënë të mundur ndalimin e shtetasit: Z. M., 32 vjeç, banues në Durrës. Nga veprimet hetimore rezulton se 32-vjeçari është autor i dyshuar për kryerjen e veprës penale “Prodhimi dhe mbajtja pa leje e armëve, armëve luftarake dhe e municionit”, në formën e grupit të strukturuar kriminal”, njoftoi policia.
Uniformat blu thonë se me këtë arrestim shkon në 15 numri i personave të vënë në kuadër të operacionit “Porositësi”.
Ky operacion u zhvillua pas dëshmive të vëllezërve Beqiraj, ndërsa mes të arrestuarve ishte një polic burgjesh dhe një ushtarak.
Dy vëllezërit Beqiraj, rrëfyen se për të kryer disa ngjarje kriminale janë paguar nga 50 mijë deri në 150 mijë Euro nga Kasandër Noga, i cili ishte porositësi i dy atentatave.
