Deklarata e personit që kishte marrë tokën me qira për ta kthyer atë në një pistë vrapimi për kuaj, ka habitur njëherësh ka bërë për të qeshur anëtarët e grupit hetimor. Personi që është shoqëruar në policinë e Durrësit dhe është marrë në pyetje përgjatë gjithë natës së të enjtes, ka pretenduar se s’ka asnjë lidhje me avionin e rrëzuar në Ishëm me pilotin italian, apo me trafikantë droge.
Ai është me origjinë nga Laçi, ndërkohë që emri i tij nuk bëhet i ditur nga policia, për shkak të mbajtjes në vëzhgim të plotë, për të mësuar më tepër rreth lëvizjeve dhe kontakteve të tij. Qiramarrësi i tokës sipas burimeve të prokurorisë dyshohet se është person që mund të jetë i implikuar në këtë histori, por ndaj tij nuk është marrë asnjë masa arresti, kjo për shkak të mungesës së provave materiale.
Asnjë gjurmë kali
Megjithëse qiramarrësi i tokës ka pretenduar se sipërfaqen e tokës e kishte punuar për ta kthyer në një pistë vrapimi për kuajt, nga këqyrja e terrenit të kësaj prone, prokuroria nuk ka konstatuar asnjë gjurmë kali. Kjo ka bërë që dëshmia e personit në fjalë të vihet në dyshim, ndërkohë që edhe personat e tjerë të pyetur për llogari të kësaj dosje, kanë deklaruar se nuk kanë parë asnjë person me kalë që të vrapojë në këtë zonë. Akoma më tepër, që në këtë zonë sipas tyre s’kanë parë grupime njerëzish me kuaj, që të kryenin gara në këtë sipërfaqe toke. Për prokurorinë, alibia e qiramarrësit të tokës nuk qëndron dhe se dyshimet të forta janë ngritur se ai e kishte punuar tokën me qëllimin e vetëm të uljes dhe ngritjes së avionit, që do të vinte nga Italia për të marrë 200 kg lëndë narkotike në luginën e Ishëm. Kjo alibi po verifikohet nga prokuroria, për të parë në se personat në Itali që kanë kontraktuar pilotin Italian kanë lidhje me pronarët dhe qiramarrësin e tokës. Por për këtë duhet dhe bashkëpunimi me drejtësinë italiane.
Asnjë i arrestuar
Megjithëse prokuroria e Krimeve të Rënda ka ngritur dyshime mbi implikimin e disa personave në këtë trafik droge, prej 48 orësh nuk është lëshuar asnjë urdhër-arresti. I vetmi i akuzuar deri më tani është piloti italian, por jo për trafik droge por për shkelje të rregullave të hapësirës ajrore. Gjatë kësaj kohe është punuar më tepër me informacionet operative dhe mbajtjen në vëzhgim dhe përgjim të disa personave të dyshuar si organizatorë të trafikut të drogës. Prokuroria është tepër e rezervuar në dhënien e informacionit në këtë pjesë, duke shtuar se tashmë hetimi i kësaj dosje është në fazën fillestare dhe se duhet kohë për të zbuluar emrat konkretë të implikuar në këtë ngjarje. Për momentin prova me e fortë e prokurorisë është dëshmia e pilotit italian Guido Guidi, i cili ka rrëfyer rreth planit të trafikimit me avion të 200 kg drogë në grykëderdhjen e Ishmit. /Shqiptarja.com/
