“Nëse donte të më vriste ai personi që qëlloi i pari në drejtim të Fabian Gaxhas mund ta kishte bërë edhe në drejtimin tim. Unë s’kam pasur lidhje fare në atë konflikt dhe kam raporte të mira me Ervin Matën”. Kështu është shprehur Ervis Martinaj përpara hetuesve që po punojnë për të zbardhur ngjarjen e rëndë në zonën e Bllokut, ku i vrarë mbeti shoku i tij, Fabian Gaxha.
Ervis Martinaj një person i njohur për drejtësinë ka mohuar gjithçka duke pretenduar se sherri ka qenë mes mikut të tij dhe komandos që qëlloi mbi të.
“Ervin Mata nuk më kishte thënë asgjë se kishte probleme me Gaxhën. Më vonë mësova se ai që ka qëlluar ka ardhur nga jashtë lokalit pasi nuk ishte fillimisht në shoqërinë e Matës dhe miqve të tij në tavolinën tjetër të lokalit. Unë po rrija në një tavolinë me Redi Popeskun (pronarin e lokalit) dhe një mikun tonë të përbashkët. Nuk është e vërtetë që unë ndodhesha në të njëjtin vend ku ishte Fabian Gaxhën dhe Eljon Hato”, ka thënë Martinaj, raporton televizioni Abc News.
Kujtojmë se në ngjarjen e rëndë të së enjtes mbrëma mbeti i vrarë Fabian Gaxha ndërsa u plagos vetë Martinaj dhe shoku tjetër i tij, Eljon Hato. Ky i fundit është në gjendje më të rëndë shëndetësore.
Për konfliktin e datës 4 Tetor janë shpallur në kërkim, tre persona; biznesmeni Ervin Mata (i dashuri i Elvana Gjatës) miku i tij Fabiol Alushi dhe komandoja e njëkohësisht trupoja e këngëtares Elvana Gjata, Merviol Bilo.
