Një biznesmen ka dëshmuar në prokurorinë e Tiranës se është personi i cili i ka dhënë Alda Klosit, shumën prej 125 mijë eurosh, referuar dhe deklaratave të vëllait të ish-zyrtares.
Teksa nuk bëhet me dije emri i tij, sipas BalkanWeb citon prokurorinë dhe thotë se ndërtuesi pranoi dhënien e borxhit dhe paraqiti një dokument me shkrim dore, të firmosur prej tij dhe vëllait të ish-zyrtares.
Por dëshmia e biznesmenit merret me rezerva nga hetuesit, përderisa paratë janë dhënë përmes një shkrese të thjeshtë dhe mes palëve nuk është firmosur një akt noterial.
Dyshimet janë të mëdha edhe për faktin, se dy ditë përpara dëshmisë së vëllait, Alda Klosi në deklarimet e saj përpara oficerit të policisë gjyqësore, nuk e përmend fare çështjen e borxhit, por thotë se paratë janë të xhaxhait.
“Nuk jemi të bindur në deklarimin e ndërtuesit, sepse ka shumë dëshmi kontradiktore. Kemi dyshime se biznesmeni mund të ketë bërë deklarim të rremë ndaj jemi duke kryer veprime të tjera hetimore”, tha një pjesëtar i grupit të hetimit.
Alda Klosi është arrestuar pas dëshmisë së pastrueses Rozeta Dobi e cila ka deklaruar se paratë e gjetura në banesën e ish-zyrtares i’a kishte dhënë vetë Klosi dhe se vjedhja ishte e inskenuar. Mbi Alda Klosin rëndojnë 3 akuza, pastrim parash, fshehje pasurie dhe deklarimit të rremë para oficerit të policisë gjyqësore./ Opinion.al
