Pas mbledhjes së grupit parlamentar të PD, Gazment Bardhi ka pasur një bashkëbisedim me gazetarët.
Ai theksoi se janë ata që kanë dështuar me reformën zgjedhore për dy vite rresht.
“Meqë i mbaron mandati nesër Komisionit të Reformës Zgjedhore, nuk i kemi penguar ne as ta bindin Ramën dhe as t’i imponohen, për ta realizuar. Deshën të flinin gjumë 22 muaj, tani bërtasin, po e dështojnë reformën ata që për dy vite nuk bënë asnjë punë në komision, nuk nxitën asnjë debat, nuk morën asnjë aksion në parlament, por qëndruan në karrige dhe titull. Ne e dinim që Rama nuk donte reformë zgjedhore, do një proces zgjedhor ku vjedh zgjedhjet, ku intimidon votuesit, përdor administratën për fushatë, ne e dimë kush është qëndrimi, ai është armik i zgjedhjeve të lira e të ndershme. Ama ishte detyrë e opozitës të ndërmerrte një strategji. E dështuan me turp dhe duhet ta mbajnë koston e dështimit me turp. Në kohën e mbetur do të shtyjmë sa të mundemi përpara sa i takon reformës zgjedhore. Nuk mund të rri pa shprehur zhgënjimin e thellë për ata që u besuam dy vite më parë”,-tha Bardhi për gazetarët.
