Kombëtarja Shqiptare e Futbollit po përgatitet për sfidën e dytë për këtë Kampionat Europian, atë me Kroacinë, në datën 19 Qershor në orën 15:00. Nga Dortmundi i pozicionuar pranë rezidencës ku ndodhet ekipi ynë, gazetari Glend Tafaj dha detaje për përgatitjet që po bën trajneri Sylvinho.
Mes batutash gazetari tha se trajneri sot është treguar më i rreptë, pasi nuk ka lejuar futbollistët që të takojnë familjarët apo të prononcohen për mediat, duke mos lejuar këto të fundit të mos i afrohen më shumë nga sa duhet rezidencës ku është akomoduar skuadra.
“Përsa i përket anës hermetike, dje Sylvinho lejoi familjarët, por edhe ne, për të qëndruar pak me lojtarët. Sot duke qenë se po i afrohemi ndeshjes është më strikt dhe deri tek gardhi na lejon t’u afrohemi. Nuk na lejon që t’i afrohemi pjesës ku qëndrojnë futbollistët në mënyrë që edhe ata të mos shpërqendrohen më. Patën dje ditën kur mund të shpërqendroheshin pak, sot do të fokusohen 100% tek ndeshja. Është e vështirë sot që të llogaritësh se çfarë ndryshime do të bëjë, por duke llogaritur se çfarë ka bërë në të shkuarën. Përshtypja është që Sylvinho disa ndryshime do i bëjë në formacionin titullar, ndoshta edhe me Brojën, ndoshta edhe me Taulant Seferin,” tha gazetari.
Më tej gazetari përshkroi dhe gjithë intenerarin që do të ndjekë ekipi kuqezi në virgjile të ndeshjes me Kroacinë.
“Nga Dortmundi do të niset nesër që në orë 08:30 të mëngjesit. Nesër pasi të sistemohen në hotel do të shkojnë të kryejnë konferencën për mediat me trajnerin në 17:15, së bashku me kapitenin Gjimshiti. Më tej 18:30 stërvitja spostohet. Nuk do mbahet në “Volsparkstadion” të Hamburgut me një kapacitet prej 51 mijë spektatorësh, por në një stadium pak më të vogël, i cili do të shërbejë si impiant për stërvitjen e fundit të Kombëtares. Pasi të bëhet stërvitja e fundit, gjithçka do të jetë gati për sfidën e datës 19,” përfundoi gazetari Glend Tafaj.
