Kreu i Komisionit Zgjedhor në Partinë Demokratike, Jemin Gjana dha një deklaratë për mediat, në përfundim të zgjedhjeve për kryetarin e partisë, ku u shpreh se gjatë procesit të votimit nuk është pranuar asnjë votues pa kartë identiteti për të shmangur parregullsitë.
Ai theksoi se ka patur tentativa të simpatizantëve për të votuar, por Gjana theksoi se për të mos përlyer procesin nuk është pranuar askush nga këta.
“Nga të gjitha të dhënat që kemi përmes informacioneve, por edhe nga të dhënat që unë pashë në këto qendra votimi që unë vetë inspektova, ka patur një fluks jo të vogël individësh që kanë votuar dhe janë në lista të veçanta ku janë mbajtur identitetet, emër, mbiemër, numri i kartës së identitetit. Natyrisht kanë votuar individë që kanë patur kartat e identitetit. Nuk është pranuar kurrkush pa kartë identiteti sepse ka pasur tentativa të simpatizantëve që paraqiten me dëshirë për të votuar, por për të mos e komplikuar dhe për të mos e përlyer procesin nuk është lejuar askush nga këta. Është një numër realtivisht i lartë dhe nuk kemi të dhëna që është kthyer kush. Nuk është se janë ofruar për të votuar anëtarë të PD që në 2-3 muajt e fundit kanë votuar në subjekte të tjera, kanë bërë zgjedhje të tjera. Nuk e kam këtë të dhënë që të kenë ardhur, të kenë debatuar apo kërkuar me insistim që të votojnë”-tha Gjana.
