Të gjithë strukturat shtetërore janë ngritur në këmbë për të vënë nën kontroll flakët që kanë përfshirë vendin. Rreziku më i madh paraqitet në jug të vendit , në Karaburun dhe Gjirokastër.
Fenomen që përsëritet cdo vit dhe në shumicën e rasteve bëhet fjalë zjarrvënie të qëllimshme. Deri tani në pranga për “shkatërrim të pronës me zjarr” janë arrestuar 6 persona për vatrat që u aktivizuan në Sarandë, Vlorë, Orikum dhe Karaburun. Por çfarë parashikon kodi penal kur kryhet kjo vepër penale?
Neni 151
Shkatërrimi i pronës me zjarr
Shkatërrimi apo dëmtimi me dashje i pronës me zjarr dënohet me gjobë ose me burgim gjer në pesë vjet. Kur nga vepra penale janë shkaktuar pasoja të rënda materiale, dënohet me burgim gjer në dhjetë vjet. Kur janë shkaktuar pasoja të rënda për jetën e shëndetin e njerëzve, dënohet me burgim nga pesë gjer nëpesëmbëdhjetë vjet.
Por rastet referohen nga prokuroria, ndërsa gjykata i liron për mungesë provash . Pikërisht për këtë arsye drejtori i zonave të mbrojtura Zamir Dedej në një intervistë më herët në Klan News deklaroi se do veprohet për të mos lejuar që barinjtë të djegin sipërfaqe toke.
Ai thotë se asnjë nga kullotat e djegura nuk do jepet në përdorim nga shteti pasi keqpërdoren dhe shpesh here kthehen në një rrezik të madh sic ndodhi në rastin e Andrea Haxhiajt i cili humbi jetën duke shuar flakët që mos t’i afroheshin banesës së tij. Në këtë betejë me zjarrin mbeti e plagosur rëndë edhe gruaja e tij. /Klan News
