I dyshuari për sulmin e 24 shtatorit në Banjskë të Zveçanit ka dalë nga qendra spitalore dhe do të dërgohet në paraburgim.
Shtetasi serb V.T, po trajtohej në Klinikën e Ortopedisë së QKUK-së për shkak të plagëve të marra nga shkëmbimi i zjarrit me forcat policore të Kosovës.
Lajmi është konfirmuar nga drejtori i Klinikës, Gani Jashanica.
“Po, ai është liruar nga klinika jonë ku ishte duke u trajtuar”, tha Jashanica.
Sipas KosovaPress, mësohet se pas lirimit, ai do të dërgohet në paraburgim.
Shtetasi serb u plagos gjatë sulmit të 24 shtatorit në Banjskë të Zveçanit. Atij i është caktuar një muaj paraburgim nga Gjykata Themelore e Prishtinës, për veprat penale “Kundër rendit kushtetues dhe sigurisë së Kosovës” dhe “Kryerja e veprave terroriste”.
Më 24 shtator, një grup i armatosur i udhëhequr nga Milan Radoiçiç sulmoi policinë e Kosovës. Si pasojë e këtij sulmi mbeti I vrarë efektivi i policisë së Kosovës, Afrim Bunjaku.
