Presidenti rus Vladimir Putin ka shpallur gjendjen e jashtëzakonshme, pasi më shumë se 20,000 ton naftë është derdhur në lumenjtë Arktik.
Putin ka kritikuar Norilsk Nickel, prodhuesin më të madh në botë të nikelit dhe paladiumit, të cilët pritën shumë kohë para se të njoftonin autoritetet për rrjedhjen.
Derdhja e naftës u bë në 29 maj, në një termocentral pranë qytetit Norilsk, duke u shpërndarë më pas në dy lumenj: Daldykan dhe Ambarnaya.
Kompania e naftës ka deklaruar më herët se ata njoftuan autoritetet në kohën e duhur, një version ky që është kundërshtuar nga Moska.
Ministri për mbrojtjen civile, emergjencat dhe fatkeqësitë natyrore, Yevgeny Zinichev, tha të mërkurën, se është raportuar për rrjedhjen në 31 maj. “Gjatë gjithë kësaj kohe, kompania u përpoq të lokalizonte vetë pasojat e derdhjes,”- tha ai.
Në vend janë dërguar disa ekipe shpëtimi, përfshirë një grup nga Ministria e Emergjencave dhe një tjetër nga Agjencia e Transportit Detar dhe Lumor./Opinion.al
