Klubi i Tiranës ka dalë me njoftim për çmimet e biletave në ndeshjen derbi si dhe për pozicionimin e tifozerive respektive. Ndërkohë ajo që bie në sy është çmimi i biletave, ku bileta më e lirë do të kushtojë 500 lekë të reja, ndërsa biletat e tribunës variojnë nga 2000 deri në 2500 lekë të reja. Duket se drejtuesit bardheblu kërkojnë të shfrytëzojnë rëndësinë e kësaj ndeshje, për të përfituar diçka edhe nga ana financiare, pasi realisht, çmimet për standartin e jetëses në Shqipëri janë disi të “kripura”.
Biletat dalin nesër në shitje tek stadiumi “Selman Stermasi”. Drejtuesit e klubit kanë patur sot një takim me Policinë për të përcaktuar përfundimisht ndarjen e stadiumit. Për efekt të masave të sigurisë është vendosur nga Policia që tifozët e Partizanit të vendosen vetëm në krahun e majtë të tribunës qendrore, përkatësisht në sektorët B1, B2, C1, C2. Sektorët për tifozerinë e Partizanit kanë një kapacitet me 2 mijë vende. Tifozeria bardheblu do të ketë në dispozicion të gjithë sektorët e tjerë të stadiumit,
përkatësisht sektorët A1, A2, H1, H2, E, F, D1, D2, G1, G2. Biletat duke nisur nga mëngjesi i së dielës do të dalin në shitje. Në orët në vazhdim do të publikohet një ndarje grafike e sektorëve të stadiumit.
Çmimet e biletave
Tribuna A1 2500 lekë (të reja)
Tribuna A2 2000 lekë
Tribuna H1/H2 600 lekë
Tribuna D1/E/F/G1 600 lekë
Tribuna D2/G2 500 lekë
Sektorët e Partizanit
Tribuna B1 2500 lekë (të reja)
Tribuna B2 2000 lekë
Tribuna C1 600 lekë
Tribuna C2 600 lekë
