Kjo fundjavë, rezervon një nga ndeshjet më të bukura të kampionatit shqiptar, siç është derbi i kryeqytetit mes Partizanit dhe Tiranës.
Ndryshe nga herët e tjera, kjo përballje do të luhet në stadiumin “Arena e Demave”, duke nisur nga ora 13:30.
Klubi i Partizanit, i ka bërë thirrje tifozëve të qëndrojnë larg dhunës dhe të tregojnë vlerat e tyre.
“Stadiumi “Arena e Demave” mirëpret të dielën për herë të parë derbin e kryeqytetit Partizani – Tirana. Ndeshjen reklamë të futbollit shqiptar presim ta shndërrojmë në një ditë feste të Kryeqytetit dhe të përjetojmë së bashku emocione të cilat i përcjell vetëm një përballje e tillë. Të qëndrojmë larg dhunës e të tregojmë vlerat tona qytetare në një stadium model që i përket një klubi legjendë të historisë së futbollit shqiptar me tifozerinë më të zjarrtë dhe më korrekte. Ne jemi një familje, ne jemi Partizani…”, thuhet në njoftimin e klubit.
Partizani ka nxjerrë gjithashtu në shitje edhe biletat. Përveç tribunave qendrore, A dhe B, ku biletat kushtojnë 2500 Lekë, në tribunat e tjera kushtojnë nga 1000 Lekë të reja.
