Për pak minuta pritet që të nisë derbi i kryeqytetit Tirana – Partizani. Si gjithmonë atmosfera në rrugët e Tiranës ka qenë e zjarrtë me tifozeritë e të dyja ekipeve që hedhin kore kundër njera tjetërs.
Derbi ka sjellë dhe një prezencë të shtuar të forcave të policisë, kryesisht në zonën pranë stadiumit “Air Albania”.
Futja e sportdashësve në shkallët e stadiumit ka filluar 2 orë para startit të sfidës, teksa nuk kanë munguar përplasjet mes tifozëve bardheblu dhe forcave të policisë, në hyrje të stadiumit. Në media janë raportuar raste kur janë hedhur shishe dhe fishekzjarrë në drejtim të policisë si dhe nuk kanë munguar sharrjet në kor.
Për këtë përballje thuhet se janë shitur rreth 18 mijë bileta por urdhri i fundit i policisë se nuk do të lejohet asnjë tifoz të hyjë në stadium pa kartë identiteti ka sjellë një problem.
Tifozët e Partizanit, ose ndryshe “Guerilsit” nuk kanë qenë dakord me këtë direktivë dhe janë mbledhur të gjithë pranë sheshit “Nënë Tereza”.
Si në çdo derbi një vëmendje të veçantë merr edhe koreografia e tifozerive. Deri tani është zbuluar një pjesë e “Fanatics” të Tiranës të cilët do të formojnë “1920”, si simbolikë ndaj shpalljes së Tiranës kryeqytet.
Formacionet zyrtare:
Tirana: Lika, Hoxhallari, Doka, Muça, Vangjeli, Celhaka, Batha, Torasa, Kale, Kobina, Ngo
Partizani: Hoxha, Belica, Bitri, Idrizaj, Haklaj, Telushi, Broja, Melo, Bardhi, Çinari, Braun. /Opinion.al
