Nuk ka surpriza. Asnjë nga tra jnerët nuk kalon në aventura përpara një ndeshjeje të rëndësishme. Mirel Josa dhe Sulejman Starova nuk kanë dyshime në prag të derbit Tirana-Partizani. Mesfushë e ngjeshur, lojë nga krahët dhe zbritje të rrezikshme për ta zënë në befasi kundërshtarin. Kjo është strategjia që do të ndjekin të dyja skuadrat, që fillimisht po mendojnë për të mos e humbur këtë ndeshje.
Fillimisht mendohet që skuadrat do të rreshtohen në këtë mënyrë, Tirana me skemën 4-2-3-1 dhe Partizani me modulin 4-4-1-1. Bardheblutë janë qetësuar vetëm një ditë më përpara, sepse Ilion Lika do të rikthehet në portë. Gjatë kësaj jave thuajse nuk është stërvitur, por vetëm dje punoi me skuadrën. Duket se ka marrë përgjigje pozitive nga stafi mjekësor dhe do të zbresë në fushë.
Përpara tij emrat thuajse janë të sigurt: Kërçiku nga e djathta dhe Hoxhallari nga e majta. Në qendër të mbrojtjes do të luajë dyshja Teqja-Muça. I vetmi ndryshim në krahasim me ndeshjet e tjera te Tirana është aktivizimi në mesfushë i Akuas. Ai do të zëvendësojë Dajën, i cili është i pezulluar për shkak të kartonëve. Pjesa tjetër e skuadrës bardheblu nuk ndryshon. Karabeci do të jetë partner i Akuas në mesfushë, ndërsa Taku, Merveil dhe Moise do të mbështesin sulmuesin Cise.
Partizani, nga ana tjetër, konfirmon katër mbrojtësit që do të qëndrojnë përpara Hoxhës: Ibrahimi, Krasniqi, Atanda dhe Kalari. Përpara tyre do të luajnë Vila, Batha, Ramadani dhe Trashi, ndërsa Torasa, pak më i avancuar, do të jetë në mbështetje të sulmuesit Ekuban. Ndërkohë, ditën e djeshme Starova ka provuar edhe Azubelin në vend të Vilës, duke u munduar të fshehë formacionin.
“Kameleonë” në mesfushë
Kjo përballje pritet të jetë një lojë shahu mes dy trajnerëve, të cilët, përveç faktit që e njohin shumë mirë futbollin shqiptar, njohin edhe njëri-tjetrin. Ndryshimet taktike pritet të jenë të shumta pikërisht në repartin e mesfushës. Gjithçka do të varet nga rezultati. Të dyja skuadrat mund të kalojnë në modulin 4-3-3 në momentin që duan të sulmojnë dhe me modulin 4-1-4-1, për ta shpërndarë më mirë forcën dhe mundësitë për të shënuar.
Lojtarët si Taku, Trashi, Torasa dhe Merveil dinë të luajnë në shumë zona të fush- ës dhe, për këtë fakt, u japin shumë alternativa dy trajnerëve. Beteja e madhe do të zhvillohet pikërisht në mesfushë dhe çdo skuadër që do të dominojë aty do të ketë mundësi të shumta për ta fituar këtë ndeshje. /panoramasport
