Deputeti i Kavajës Parid Cara është ankuar publikisht për ministrin e Shëndetëisësisë, Ilir Beqaj. Sipas tij, jo vetëm ai, por edhe të tjerë nuk u hapin telefonat deputetëve, duke harruar se kur vijnë në komisione kërkojnë vota për projekligjet. Më poshtë një pjesë e intervistës së tij, dhënë për Panoramën
Pak javë më parë ju keni kritikuar ministrin e Shëndetësisë, Ilir Beqaj, që nuk i është përgjigjur një kërkese për të larguar një drejtor të paaftë në Kavajë. Cilat janë marrëdhëniet në grupin e PS-së mes deputetëve dhe ministrave, vijojnë ata që të mos i hapin telefonat?
Prej disa kohësh i kam kërkuar ministrit të Shëndetësisë që të bëjë një ndryshim në Kavajë, pasi një prej drejtorëve nuk është në nivelin që kërkon ai pozicion. Nuk pata asnjë reagim nga ministri, prandaj dhe u detyrova ta bëja publik rastin. Kanë qenë jo të pakta rastet kur ministrat kanë bërë emërime nëpër zona pa u konsultuar më parë me deputetët e zonave dhe pastaj jemi ne ata që përballemi me problemet e qytetarëve. Janë gjithashtu jo të pakta rastet kur ministrat nuk u hapin telefonat deputetëve, aq sa kjo çështje është ngritur edhe në mbledhjet e grupit parlamentar. Ndonjë prej tyre e harron që mbështetja e deputetëve u duhet si në komisionet parlamentare, ku ata sjellin projektligjet, ashtu edhe në seancë.
