Emri i Ilir Ndraxhit, si dhe disa zyrtarëve të tjerë të Partisë Socialiste, doli në përgjimet telefonike të publikuara ditën e djeshme nga gazeta ‘Bild’. Bëhet fjalë për një bisedë mes vëllait të deputetit Ndraxhi dhe Astrit Avdylajt, ku dyshohet se ky i fundit ka ndërhyrë për të futur në listën e deputetëve të PS kandidaturën e Ilir Ndraxhit.
Por deputeti Shijakut e ka mohuar këtë pretendim. Ai shprehet i bindur se mandati është i tiji dhe kandidatura ka ardhur si pasojë e suksesit dhe popullaritetit të tij.
Në një intervistë televizive, Ndraxhi ka thënë se nuk e ka takuar kurrë Astrit Avdylajn. Madje ai shkon deri aty sa thotë se Astriti kishte telefonuar vëllain e tij për t’ju lutur që ai të pranojë kandidimin për PS pasi është krenari e zonës.
“Nuk kam folur në asnjë moment me Astrit Avdylajn. Nuk ka pasur ndikim në kandidimin tim. Absolutisht asnjë lloj kontakti me të. Asnjëherë! Asnjë takim personal me të. Ai ka marrë vëllain tim. I ka thënë të lutem ta pranojë kandidimin Iliri sepse e kemi krenari ta kemi në zonë. Unë nuk kam folur me të. Madje, ata kanë qenë në burg e unë nuk e kam ditur që ata kanë dalë në liri. Edhe vëllai u çudit kur dolën përgjimet. Ai ka folur me të, siç ka folur edhe me shumë njerëz të tjerë. 200 apo 500 votat që mund të ketë ai, nuk kanë asnjë ndikim në 8000 vota që unë kisha në zonë falë popullaritetit tim. Isha i katërti në listë. Kam dale deputet nga mbështetja e votuesve të mi”, tha Ndraxhi.
Përgjimet e djeshme nxitën një debat të madh publik pasi ato përmendnin një sërë zyrtarësh të lartë. Kryeministri Rama nuk zgjodhi as të komentonte këtë ngjarje. Sipas deputetit Ndraxhi ai as nuk e ka telefonuar atë, madje këtë nuk e ka bërë as Vangjush Dako.
“Kryetari jo! Edhe me Dakon nuk kam folur dje e sot. Takimin e fundit me të e kisha për Festën e Bajramit, të martën, kur bëmë vizitat fetare. Jemi në fushatë. Diskutuam për 30 qershorin, por jo për përgjimet.”
Deri më tani deputeti i Shijakut mohon të jetë thirrur ndonjëherë nga Prokuroria dhe shprehet i hapur në rast se do të kërkonin paraqitjen e tij në organet e drejtësisë. Nuk mendon të njëjtën gjë për mandatin e deputetit. Ai nuk është i gatshëm ta lëshojë atë, pasi pretendon se nuk ka asnjë lidhje me grupin Avdylaj.
“Unë kam punuar në zonë. Si deputet kam bërë çfarë kam mundur për banorët e zonës time elektorale. Mandati nuk është dy vjet. Është katër. Ne do të tregojmë forcën tonë më 30 qershor”, tha Ndraxhi.
Përgjimi 3 është një bisedë mes Astrit Advylaj dhe Arjan Ndraxhit. Advylaj pyet Arjanin (vëllai i deputetit Ilir Ndraxhi), nëse e kanë marrë në telefon Ilirin për t’i njoftuar kandidimin për deputet në listat e Partisë Socialiste. Astriti i thotë më tutje se ata do të punojnë fort për të arritur rezultat të lartë zgjedhor për Partinë Socialiste. Pak ditë më vonë, Ilir Ndraxhi u emërua në vend të katërt në listën e kandidatëve të Durrësit për partinë Socialiste, duke e pasur postin e deputetit të sigurt. /Opinion.al
