Diskutimet mbi Ligjin për Lirinë Fetare kanë sjellë tensione të shumta në sallën e Parlamentit të Malit të Zi. Situata arriti deri aty sa pati edhe thirrje për luftë nga deputetë të opozitës.
Deputetët serbë shkaktuan incidente në sallën e Kuvendit, duke bllokuar foltoren e kryeparlamentarit Ivan Brajoviç, ndërsa nuk munguan thirrjet për luftë, fyerje të rënda dhe tentime për përplasje fizike.
Deputeti i Frontit Demokratik, Andrija Mandiç bëri thirrje për luftë, duke kërkuar që të jenë në gatishmëri të gjithë bashkëluftëtarët e tij që kishin luftuar në vitet 90’ dhe 99’.
Më pas pjesëtarët e sigurimit të Kuvendit të Malit të Zi nxorrën me dhunë nga salla deputetët e opozitës serbe të Frontit Demokratik (FD).
Në fjalën e tij përmbyllëse, Kryeministri Dusko Markoviç paralajmëroi anëtarët e Frontit Demokratik të opozitës të mos kërcënojnë dhe i hodhi poshtë kërcënimet si të padenjë.
Çka parasheh Ligji për Liritë Fetare
Qeveria e Malit të Zi miratoi në fillim të dhjetorit një Propozim të ri për një Ligj mbi Lirinë e Fesë dhe statusin Ligjor të Komuniteteve Fetare, i cili nuk është i pranueshëm për Kishën Ortodokse Serbe në Mal të Zi.
Një nga dispozitat e ligjit është që objektet fetare dhe pronat e komuniteteve fetare, gjegjësisht kishat dhe manastiret e Kishës Serbe që deri në vitin 1918 kanë qenë në pronësi shtetërore, sërish të bëhen prone e shtetit. Kjo do të ndodhë kryesisht me ato objekte dhe toka që nuk kanë prova të pronësisë. /Opinion.al
