Deputeti Arben Pëllumbi pranon se ka ndërhyrje dhe në administratë për të punësuar njerëz.
Djali i një prej deputetëve themelues të PS, Servet Pëllumbit tha në një prononcim për mediat se si pasojë e mentalitetit në të cilin jetojmë ka ndërhyrje në administratë për të punësuar njerëz por kjo gjë është luftuar fort nga qeveria.
“Sigurisht që në shumicën e tyre bëhen sipas meritës. Por ne të mos harrojmë se ku jetojmë, se nga çfarë mentaliteti vijmë. Sigurisht ka pasur ndërhyrje dhe në administratë për të punësuar njerëz. Por qeveria jonë, mazhoranca jonë është duke luftuar fort për ta bërë këtë fenomen sa më të sporadik dhe sa më të vogël. Kemi bërë një sërë portalesh pikërisht për këtë arsye ndërhyrjet dhe politizmat e panevojshme” tha Pëllumbi.
Këto deklarata vijnë pas përgjimeve të gazetës ‘Bild’ ku në disa prej tyre flitet për presione ndaj punonjësve që të deklarojnë votën e tyre për Partinë Socialiste dhe në disa raste të tjera premtohen ngritje në detyrë pas përfshirjes në fushatën zgjedhore. I pyetur në lidhje me përgjimet deputeti Pëllumbi tha se ato duhen hetuar dhe se PS e ka bërë të qartë që nuk mbron askënd që ka çështje penale.
“Le të themi që përgjimet deri në këtë moment duhet të shkojnë në rrugën e tyre të hetimit dhe të nxjerrjes së përgjegjësive penale. Partia Socialiste, dhe sigurisht ne si grup parlamentar e kemi bërë të qartë qëndrimin tonë se nuk mbrojmë askënd nëse ka një çështje penale” shtoi deputeti i Partisë Socialiste. /Opinion.al
