Deputeti i Bundestagut, Peter Bayer, tha se Gjermania e kundërshton idenë e këmbimit të territoreve ndërmjet Kosovës dhe Serbisë.
“Biseduam për proceset nëpër të cilat po kalon Kosova. Kemi folur për dialogun mes Kosovës dhe Serbisë, të cilin e mbështesim, por edhe për temën e këmbimit të territoreve, të cilën Gjermania e kundërshton fuqishëm. Ne do të jemi partnerë mbështetës i Kosovës për proceset e ardhshme, sigurisht me një sy kritik”, tha Bayer në Prishtinë.
Komentet e tij erdhën pas takimit të tij dhe deputetit tjetër gjerman, Christian Schmidt, me kryeministrin e Kosovës, Ramush Haradinaj.
Zyra e Kryeministrit njoftoi se gjatë takimit, Haradinaj bisedoi me deputetët gjermanë për procesin e dialogut me Serbinë, për bashkëpunimin ndërmjet Kosovës dhe Gjermanisë, por edhe për procesin e liberalizimit të vizave për qytetarët e Kosovës.
Kryeministri Haradinaj është kundër idesë së ndryshimit të kufirit pasi sipas tij prekja e kufijve mund të sjellë tragjedi në Ballkan. Qëndrime pro dhe kundër kësaj ideje ka edhe në qarqet ndërkombëtare./Opinion.al
