TIRANË-Socialisti i vjetër dhe ish-Presidenti, Rexhep Meidani ka hedhur kritika të ashpra ndaj Kryeministrit Edi Rama. Duke folur për ligjin e ri të dekriminalizimit ai tha se pastrimi i figurës duhet të vazhdojë edhe përtej sallës së Parlamentit, përmes një proçesi të ri zgjedhor, të plotë ose të pjesshëm.
“Deputetët me të shkuar kriminale e bënë Shqipërinë gazi i botës”, shkruan Meidani. Ish-presidenti i Republikës, i kërkon kryesocialistit Rama të kërkojë minimumi falje për këtë situatë, pasi e vlerëson përgjegjësi personale të tij përfshirjen në listat e kandidatëve, njerëz me të shkuar kriminale. Sipas Meidanit, me përfshirjen e individëve me të shkuar kriminale, Rama ka njollosur jo vetëm emrin dhe historinë e grupit parlamentar socialist, por edhe parlamentit shqiptar.
