“Disa depo farmaceutike marrin barna nga jashtë në prag të skadencës dhe paguhen për ti shkatërruar këtu në Shqipëri”. Kështu deklaron deputetja demokrate Albina Deda e cila më parë ka punuar si mjeke. Ajo ka hedhur akuza të rëndë, por nuk ka permendur emrat e depove që kryejnë këto manovra.
“Disa depo farmaceutike marrëdhëniet me furnitorët e tyre jashtë i kanë në kushte ku firma shqiptare kontraktohet (duke u paguar) për ti marrë medikamentet për ti shkatëruar pasi janë shumë afër skadencës”, tha ajo. Por jo vetëm kaq. Ka edhe medikamente që u ndryshohet data e skadencës dhe hidhen ne treg:
“Produktet hyjnë në tregun shqiptar, u bëhet ndryshimi i datës së skadencës mbi ambalazhim dhe më pas tregtohen. Në këtë mënyrë jeta e pacientëve është e rrezikuar”.
Sipas saj, në tregun farmaceutik shqiptar janë mallrat më të këqija në Europë, kjo sepse kështu e orientoi tregun Ministria e Shëndetësisë. “Ulja e marzhit të fitimit për medikamentet ka sjellë që depot farmaceutike të orientojnë importimin e medikamenteve nga vendet e zhvilluara perëndimore drejt vendeve të lindjes apo aziatike si India. Për të mos dalë me humbje grosistët veprojnë në kurriz të cilesisë. Tregu shqiptar farmaceutik po mbushet me produkte të lira dhe aspak cilësore”, vijoi Deda.
Ka një larmishmëri medikamentesh të cilat janë shumë cilesore por që QKKB nuk i autorizon, pra nuk i jep të drejtë për ti importuar asnjë depoje farmaceutike. Këtu deputetja përmend: Advil, flagyl apo medikamente e kremra të ndryshme gjinekologjike, etj.
Mjekët i shkruajnë shpesh në receta këto medikamente duke bërë që të lulëzojë tregu i zi, pra futja kontrabandë e produkteve cilësore, vijoi me tej Albina Deda duke denoncuar fenomenin. Ajo tha se kjo është një vepër kriminale. /Opinion.al
