Policia e Shtetit ka reaguar menjëherë pas kronikës së transmetuar sonte në emisionin “STOP” në TV Klan, ku dy punonjës të saj u denoncuan për mitmarrje.
Me anë të një njoftimi për mediat, policia bën me dije se ata janë pezulluar nga detyra me urdhër të Drejtorit të Policisë së Shtetit.
Mësohet se ndaj dy policëve ka nisur hetimi penal dhe pritet arrestimi i tyre.
Mbrëmjen e sotme, emisioni investigativ “STOP”, denoncoi rastin e një gruaje dhe historinë e saj të mitmarrjes me zyrtarë të Policisë së Shtetit.
Pas problemeve me dadon e vajzës dhe për shkak të konfliktit me të, u desh ndërhyrja e forcave policore të Komisariatit Nr.4.
Por nga ky moment fillon për zonjën një kalvar pazaresh në mënyrë, që problemi i saj, të mbyllej njëherë e përgjithmonë.
Specialisti i Krimeve i kërkon 1000 euro, por pas gatishmërisë për t’ia dhënë këtë shumë, nis pazari për 500 euro të tjera nga ana e punonjësve të policisë.
“Kur shkova ta marr, dado nuk pranonte të më jepte fëmijën tim, arriti puna në debate, u njoftua edhe policia. Ai oficeri që e mori çështjen në dorë më thotë që s’ka problem dhe më shkruan një shumë prej 1 000 eurosh, që ta mbyllim shpejt e shpejt pa probleme këtë punë, pa bërë ato denoncim.
Unë thashë për çfarë arsye do të bëjnë ato denoncim?! Sepse jam unë për të bërë denoncim… Për ta mbyllur këtë gjë, që të shkoja sa më shpejt tek fëmija i thashë në rregull, do t’i jap ato 1 000 euro. Ai duke parë gatishmërinë time më thotë jo 1 000 euro, por 1 500 euro. Shko gjej me sekonda 1 000 euroshin dhe pjesën tjetër më mbrapa, më tha dhe ndërkohë vajzën po e mbaj peng”, tregon denoncuesja.
