Të paktën 10% e të dhënave të zgjedhësve në lista janë modifikuar në kundërshtim me kodin zgjedhor. Ky është denoncimi që ka bërë sot ish deputeti i Partisë Demokratike, Endri Hasa.
Ai i referohet konkluzioneve të raportit të auditimit të kryer sipas kodit zgjedhor mbi veprimet në Regjistrin Kombëtar të Gjendjes Civile i paraqitur dje në mbledhjen KQZ. Në këtë raport sipas Hasës është evidentuar se 350.853 qytetarëve i janë modifikuar të dhënat e banimit dhe për këto veprime mungojnë gjurmët e sistemi dhe dokumentacionet përkatëse. Gjithashtu rezultojnë se janë shtuar 47.747 kode të reja banesash pa asnjë dokumentacion.
Për të pasqyruar denoncimin e tij Hasa tregon se në disa qytete ka qytetarë të regjistruar në vende ku nuk ka banesa fare. Në Korce përshembull, janë regjistruar 1051 zgjedhës në godinën e Fakultetit të Shkencave të Natyrës. Po në këtë qytet rezultojnë 495 zgjedhës banues në një zonë ku në fakt është lulishte. Në Durrës qendra e votimit 1470, në godinën e vogël me nr 22 banojnë plot 944 zgjedhës. Në Elbasan QV 2350 banojnë 408 zgjedhës në një hyrje të vetme pallati të ndërtuar para vitit 90.
Ndërkohë kujtojmë se mbi 3.5 milionë shqiptarë janë shpallur si votues për zgjedhjet vendore të 30 qershorit nga Ministria e Brendshme. Ky numër ka një mospërputhje të madhe në krahasim me numrin e popullsisë mbi 18 vjeç në Shqipëri që është rreth 2.6 milion banorë sipas INSTAT.
Teprica prej 900 mijë votuesish ende nuk është bërë shumë e qartë nga organet përkatëse, por mesa duhet raporti i auditimit i prezantuar në KQZ i është adresuar disa prej këtyre pikëpyetjeve. /Opinion.al
