Koronavirusi vijon të regjistrojë raste të reja dhe viktima dita ditës. Përhapja e epidemisë jashtë Kinës është çështja më shqetësuese sipas OBSH-së. Megjithatë nga rreth 93 mijë të prekur në gjithë botën, 80 mijë janë në Kinë.
Atje ndodhet edhe një komunitet shqiptar i cili sipas Ambasadës sonë në Pekin është rreth 400 persona. Ditët e para të epidemisë, ambasadori, Selim Belortja i bëri thirrje shqiptarëve që të mbuloheshin dhe nëse donin të ktheheshin në Shqipëri këtë duhet ta bënin me paratë e tyre sepse ambasada nuk kishte buxhet.
Por në një denoncim të ardhur për Opinion.al thuhet se komuniteti i shqiptarëve është edhe më i madh. Denoncuesi thotë gjithashtu se personeli i ambasadës është kthyer në Shqipëri pa asnjë njoftim.
“Mirëmbrëma sapo pash këtë vidio dhe doja të shtoja diçka. Ambasada jonë këtu nuk di sa shqiptarë janë në Pekin jo më në Kinë. Asnjëherë skemi ikur të regjistrohemi se ato sdijnë ku janë vetë. Ndërkohë ambasadat e tjera çdo njeri që vjen këtu regjistrohet. Lajmet e fundit thuhet se ambasada është kthyer në Shqipëri pa asnjë njoftim, është për të ardhur keq. Ne jemi më shumë se 500 shqiptarë por ka plot që s’duan të bëjnë pjesë tek grupet e wechatit me shqiptarët. Transporti publik në Pekin sështë mbyllur as metroja, as autobusat asgjë por fatkeqësisht janë bosh nuk hypën njeri. Vendet turistike janë të mbyllura me këto hekurat dhe ato të lagjes që hyjnë duhet të ketë kartë për të hyrë që je banor këtu dhe të masin temperaturën” thuhet në denoncimin e bërë. /Opinion.al
