(Foto ilustruese)
Një aksident me pasojë plagosjen e një personi ka ndodhur paraditen e së shtunës në rrugën dytësore pranë Casa Italia në Tiranë. Në të janë përfshirë një automjet dhe një motor, ku si pasojë e përplasjes, është plagosur lehtë në këmbë drejtuesi i motorit. Menjëherë, pas aksidentit, policia dhe ekspertët rrugor kanë mbërritur në vendngjarje për të sqaruar rrethanat e aksidentit.
Lajmi është konfirmuar nga familjarët e drejtuesit të mjetit, të cilët përmes një denoncimi në Opinion.al, sqarojnë se djali i tyre Gledis Dedaj, 26-vjeç, ka aksidentuar pa dashje dhe në rrethana krejt aksidentale me makinën e tij drejtuesin e një motori, ndërsa vënë në dukje se në mendimin paraprak të ekspertëve theksohet se gjatë testit ai nuk rezultoi përdorues alkooli, si dhe makina drejtohej me një shpejtësi brenda normave të qarkullimit rrugor.
Gjovalin Dedaj, babi i 26-vjeçarit, tregon se djali i tij është shoqëruar nga policia si fillim në Komisariatin nr.6 në orën 11:10, dhe më pas është transferuar në Drejtorinë e Tiranës. Sipas tij, oficeri i policisë gjyqësore ende nuk ka dorëzuar dokumentin në Prokurori dhe për ironi të fatit, në procesverbalin e ndalimit, shkruan se ndalimi i Gledis Dedajt është bërë në orën 16:00, kur fare mirë dihet se ai është ndaluar në orën 11:10 dhe këtë fakt e vërtetojnë kamerat e komisariatit.
Prej 24 orësh, Dedaj qëndron në mjediset e Drejtorisë së Tiranës, ndërsa eksperti ende nuk ka dërguar aktin e ekspertimit në Prokurori, ndërsa kujtojmë se deputetit Aqif Rakipi, i cili aksidentoi për vdekje një kalimtar, akt-eskpertiza dhe çdo procedurë e nevojshme u bë brenda një ore të vetme.
