Një gjykatë në Turqi ka dënuar me burg gjashtë gazetarë dhe një punonjëse të financave të medias Sozcu, me akuzat se kanë ndihmuar në orkestrimin e grushtit të shtetit të dështuar në vitin 2016.
Gazeta Sozcu e përshkroi dënimin si një shenjë të zezë në historinë e shtypit të lirë. Të tetë të pandehurit e pranishëm në seancën gjyqësore kërkuan të shfajësohen nga akuzat.
Ankaraja ka shënjestruar në vazhdimësi, përkrahësit e dyshuar të Fethullah Gulenit, një klerik mysliman me bazë në SHBA, që nga përpjekja për atë që autoritetet turke e quajnë tentativë për grusht shteti, në korrik të vitit 2016, në të cilën u vranë rreth 250 njerëz.
Kolumnistët e shquar, Emin Colasan dhe Necati Dogru, si dhe redaktorët Mustafa Cetin dhe Metin Yilmaz u dënuan nën akuzat se kanë ndihmuar rrjetin Gulenist, ka shkruar gazeta Sozcu. Secili prej tyre u dënua me më shumë se tre vjet burg.
Koordinatori i lajmeve në internet, Yucel Arı, reporteri Gokmen Ulu dhe drejtoresha e financave, Yonca Yücekaleli, u dënuan me dy vjet dhe një muaj burg.
Gjykata vendosi të lirojë gazetaren Mediha Olgun ndërsa vendimi për pronarin e gazetës Burak Akbay u shty pasi ai po gjykohej në mungesë. Që nga viti 2016-të më shumë se 77.000 njerëz janë burgosur dhe janë në pritje të gjykimit si dhe rreth 150.000 nëpunës civil, personel ushtarak dhe të tjerë janë larguar ose pezulluar nga puna e tyre, nën akuzat se janë përkrahës të Gulenit.
