Këshilli i Lartë i Drejtësisë, në mbledhjen e ditës së sotme, nisi me diskutimin e kërkesës së Kryetarit të Gjykatës së Lartë për fillimin e procedurave për deklarimin e përfundimit të mandatit të gjyqtares së Gjykatës së Lartë zj. Majlinda Andrea.
Gjykata e Lartë dënoi disa ditë më parë me 4 vjet burg për akuzën e “korrupsionit” anëtaren e pezulluar të kësaj gjykate, Majlinda Andrea. Pesë kolegë të saj, anëtarët e Kolegjin Penal të çështjes i vlerësuan të provuar dyshimet e Prokurorisë së Përgjithshme për përfshirjen e Andreas në një aferë korruptive prej 50 mijë eurosh.
Në përfundim të diskutimeve, anëtarët e Këshillit vendosën t’ia kalojnë për shqyrtim këtë çështje, Presidentit të Republikës.
Kjo shumë parash, sipas Prokurorisë, iu dorëzua bashkëshortit të saj, Odhise Andreas, në korrik të vitit të kaluar, në këmbim të një vendimi gjyqësor të favorshëm në një çështje pronësie.
Në të njëjtin vendim kolegët gjyqtarë i “kursyen” dërgimin në qeli Andreas. Gjykata e Lartë vendosi pezullimin e ekzekutimit të dënimit me burg, duke e lënë atë në Shërbim Prove për një periudhë 3-vjeçare.
Po për akuzën e “korrupsionit” u shpall fajtor edhe bashkëshorti i gjyqtares, Odhise Andrea, ishkëshilltar në Kuvendin e Republikës dhe po ashtu edhe tre të pandehurit e tjetër të çështjes, Odhise Dashi, Ilia Çabiri dhe Eleni Lino. Gjatë shpalljes së vendimit, asnjëri prej bashkëshortëve Andrea nuk ishte i pranishëm në sallë, ku përfaqësoheshin nga avokatët e tyre. Ky vendim shënon të parin rast kur një anëtar i Gjykatës së Lartë shpallet fajtor për korrupsion.
DENIMET
Kolegjit Penal i çështjes gjyqësore në ngarkim të Majlinda Andreas dhe katër të bashkëpandehurve të saj u futën dje në sallën e gjyqit 55 minuta me vonesë nga orari i paracaktuar për seancën. Pasi ftuan të pranishmit të ngriheshin në këmbë, relatorja Evelina Qirjako lexoi dispozitivin e vendimit.
Referuar vendimit, e pandehura Majlinda Andrea u deklarua fajtore për akuzën e “korrupsionit aktiv të gjyqtarëve”. Përfundimisht ajo duhet të mbajë kontakte me Shërbimin e Provës për tre vjet. Të njëjtin fat nuk e pati bashkëshorti i saj, i pandehuri Odhise Andrea. Ai u dënua me 1 vit e 6 muaj burg, dënim që duhet ta shlyejë në qeli, pasi u gjykua në masën e sigurisë “arrest shtëpie”.
Për dy bashkëshortët Andrea, Gjykata e Lartë vendosi si dënim plotësues heqjen e të drejtës së ushtrimit të funksioneve publike për një periudhë 5- vjeçare. Nga ana tjetër, Kolegji Penal pranoi kërkesën e Prokurorisë së Përgjithshme për konfiskimin e një shume prej 50 mijë eurosh, e sekuestruar në llogaritë bankare të bashkëshortëve Andrea.
Të pandehurit Petraq Dashi, i akuzuar si personi që i dorëzoi 50 mijë eurot bashkëshortit të gjyqtares, u dënua me 1 vit e 6 muaj burg. E njëjta masë dënimi u dha edhe për të pandehurit Ilia Çabiri dhe Eleni Lino, dy përfituesit nga vendimi i ndikuar i gjyqtares. Çabiri u gjykua në masën e sigurimit “arrest në burg” dhe thuajse e ka përfunduar masën e dënimit përmes kohës së paraburgimit.
Për të pandehurën Lino, gjykata pezulloi dënimin me burg duke e lënë në Shërbim Prove për një periudhë 2-vjeçare.
KORRUPSIONI
Sipas dosjes hetimore të Prokurorisë së Përgjithshme, “strumbullari” i rastit të korrupsionit në Gjykatën e Lartë ka qenë një proces gjyqësor për njohjen e një sipërfaqeje toke prej 40 hektarësh në Butrint. Për të pasur një vendim të favorshëm, përfaqë- suesi i familjes ish-pronare Ilia Çabiri, përmes Petraq Dashit ka ndërmjetësuar dhënien e një ryshfeti te bashkëshorti i gjyqtares, veprim i kryer më 11 korrik 2016.
“Provohet se të pandehurit Odhise Andrea dhe Majlinda Andrea, bashkëshortë, në bashkëpunim me njëri-tjetrin, kanë marrë nga i pandehuri Petraq Dashi shumën 50.000 euro, me qëllim dhënien e një vendimi gjyqësor civil në Gjykatën e Lartë në favor të të pandehurve Ilia Çabiri, Petraq Dashi dhe Eleni Lino, nisur nga fakti se e pandehura Majlinda Andrea ishte një nga anëtaret e trupit gjykues që ka gjykuar çështjen civile për të cilën interesoheshin shtetasit që kanë paguar shumën prej 50.000 eurosh”, thuhej në dosjen e Prokurorisë së Përgjithshme.
Një nga provat kryesore të prokurorisë në këtë çështje ishin përgjimet e bisedave telefonike të realizuara mes të pandehurve. Gjatë gjykimit të pandehurit mbajtën qëndrim mohues në lidhje me akuzën. Përmes mbrojtësve të tyre, të pandehurit kërkuan pafajësi dhe pretenduan se akuza e “korrupsionit” nuk provohej./A.Bajrami
Burimi: Panorama
