Revizionizëm i krahasuar me Rusinë. Kështu e ka cilësuar sjelljen e Turqisë Ministri i Jashtëm i Greqisë Nikos Dendias, ndërsa tha se Greqia nuk do të përgjigjet me të njëjtën mënyrë, pasi është një vend modern dhe demokratik.
“Fakti që ne nuk u përgjigjemi në të njëjtën mënyrë fyerjeve, shpifjeve, kërcënimeve, ka të bëjë me kulturën tonë dhe faktin që ne besojmë në një vend modern evropian, demokratik, progresiv. Këta jemi ne. Ne nuk do të kthehemi me ofendime të ndërsjella me Turqinë dhe nuk do të ngremë kacafytje dhe zënka”, theksoi ai teksa foli në një aktivitet politik në Fokida.
Ministri i Jashtëm paralelizoi revizionizmin rus me revizionizmin e Turqisë.
“Shembulli i Rusisë, nëse e projektoni në fqinjësinë tonë, është pikërisht revizionizmi turk. “Me forcë kërkojnë të ndryshojnë kufijtë”. Jo! 100 herë jo! Kjo nuk bëhet kështu”, vuri në dukje z. Dendias./Opinion.al
