Pas katër ditësh stër vitje, nis të marrë formë skuadra kuqezi që do të prezantohet në miqësoren e së shtunës ndaj Austrisë.
Pritet që Shqipëria të zbresë në fushë me skemën që e nderoi gjatë eliminatoreve të fundit, pikërisht 4-3-2-1. Nisur nga stërvitjet e këtyre ditëve, edhe dje u konfirmua titullar në mesfushë Ergys Kaçe.
Nga ana tjetër, në formacion ra në sy rikthimi i mesfushorit Amir Abrashi, i cili me sa duket do të zërë vendin e Burim Kukelit.
Kur ka mbetur edhe një seancë stërvitore për të saktësuar 11- shen që do të startojë ndaj Austrisë, dje në seancën e zhvilluar në Durrës, stafi kuqezi dha një ide të qartë për titullarët. Me Berishën në portë, përpara tij u rreshtuan Cana dhe Mavraj në qendër të mbrojtjes, të mbështetur nga krahët me Agollin në të majtë dhe Hysajn në të djathtë.
Mesfusha ka pësuar transformime të herëpashershme, pasi gjatë këtyre ditëve De Biazi ka provuar disa lojtarë.
Megjithatë, nesër italiani pritet të hedhë nga minuta e parë Abrashin, Kaçen dhe Xhakën në qendër, ndërsa krahët do t’i mbulojnë Roshi në të djathtë dhe Lenjani nga e majta.
Ndërsa sulmi, me shumë mundësi, do t’i besohet Bekim Balajt, i cili deri më tani duket sikur ka fituar duelin me Sokol Cikalleshin për të qenë titullar kundër Austrisë.
Ky ishte formacioni me të cilin u vunë në zbatim disa prej skemave të përgatitura nga De Biazi në stërvitjen e zhvilluar dje në Durrës.
Stërvitja
Dje kuqezinjtë zhvilluan vetëm një seancë stërvitore, për shkak se paradite ishte ceremonia e prezantimit të uniformave të reja në kryeqytet dhe koha nuk premtonte. Seanca e vetme nuk u drejtua nga Xhani De Biazi, por nga ndihmësit e tij, Paulo Tramexani, dhe Erjon Bogdani.
Kreu i pankinës zgjodhi të udhëtojë drejt Elbasanit, për të ndjekur nga afër Kombëtaren Shpresa. Në fakt, stërvitja e djeshme nisi me vonesë, rreth orës 17:30.
Pas pak minutash nxehmje, Tramexani nisi t’u jepte detyrat taktike lojtarëve, me qëllim ekzekutimin e disa skemave të mirëmenduara nga De Biazi.
Goditjet standarde dhe skemat kundërsulmuese pothuajse konsumuan seancën e djeshme. Në disa minuta skuadra ishte në kushte loje, ndërsa sulmuesit Balaj, Sadiku, Cikalleshi dhe Shala vijuan të praktikoheshin edhe pas përfundimit të seancës stërvitore.
Pjesa tjetër e lojtarëve, menjëherë pas përfundimit të stërvitjes nxituan për të ndjekur Kombëtaren Shpresa.
Problemet
Dëmtohet Shkëlzen Gashi, por nuk ka alarm. Sulmuesi kuqezi ka pësuar një kontraktim në puplën e këmbës së djathtë dhe dje pas disa minutash stërvitje e ndërpreu këtë të fundit, pasi ndjeu dhimbje të forta.
Burime të “Panorama Sport” pranë lojtarit treguan dje se dëmtimi është i lehtë dhe deri të shtunën Gashi mund të jetë gati.
Nga ana tjetër, mesfushori Ledjan Memushaj nuk u stërvit për shkak të një dëmtimi në brinjën e djathtë. Vlonjati ka ardhur i dëmtuar pikërisht gjatë një ndeshjeje ku është aktivizuar me skuadrën e tij, Peskara. /panorama sport
