TIRANË- Grupi parlamentar i PD, dhe konkretisht, kryetari Edi Paloka ka dorëzuar sot në Kuvend projektligjin, i cili nëse miratohet i i hap rrugë hetimit ndërkombëtar të CEZ. Deri tani hetimi ndërkombëtar është kërkuar publikisht nga Berisha dhe Meta, të cilët kanë qenë në kohën kur erdhi CEZ në Shqipëri Kryeministër dhe zv.Kryeministër.
Në shkresën shoqëruese të draftit, PD thotë se “duke vlerësuar kompleksitetin që ka hetimi i çështjes “CEZ” dhe për faktin se në këtë aferë janë të përfshirë zyrtarët më të lartë të shtetit (Kryeministri, Kryetari i Kuvendit, Ministri i Energjitikës, Avokati i Shtetit, etj.) duhet një hetim i pavarur nga ekspertë ndërkombëtar, të Shteteve të Bashkuara të Amerikës apo vendeve të Bashkimit Europian”.
Po sipas PD-së, hetimi nuk mund të kryehet vetëm nga prokuroria shqiptare. “Presioni politik ndaj organit të prokurorisë dhe kërcënimet e vijueshme që i bëhen sistemit të drejtësisë nga mazhoranca aktuale, nuk krijojnë anjë premisë për të patur një hetim të plotë dhe të pavarur”, thuhet në letrën e PD-së drejtuar kreut të Kuvendit, Ilir Meta.
Ne besojmë, se është në interesin e Shqipërisë dhe shqiptarëve, që kjo cështje të hetohet në mënyrë të plotë dhe gjithëpërfshirëse, nën një ekspertizë të specializuar ndërkombëtare. Për këtë qëllim propozojmë për miratim nga Kuvendi projektligjin “Për lejimin e hetimit të pavarur ndërkombëtar mbi akuzat publike të ngritura mbi cështjen “CEZ Shpërndarje sh.a.”.
Përsa më lart, kërkojmë shqyrtimin e këtij projektligji në Kuvendit e Shqipërisë dhe miratimin e tij pas asnjë vonesë të pajustifikuar.
PROJEKTLIGJ PER HETIMIN NDERKOMBETAR TE RASTIT CEZ – 25.09.2015
