Ditën e sotme kryeministri Edi Rama, ka pritur në takim Komisionerin e BE-së për Menaxhimin e Krizave, Janez Lenarčič i cili vjen në Tiranë për të ndihmuar për situatën pas tërmetit tragjik të 26 nëntorit.
Komisioneri i BE-së, Lenarčič është shprehur në këtë takim se prania e tij në Shqipëri është për të treguar solidaritet dhe mbështetje për Shqipërinë në këto ditë të vështira.
Lenarčič ka premtuar gjithashtu një angazhim të fortë e solid për të bërë gjithçka për të kaluar këtë situatë të vështirë.
“Prania ime tregon solidaritet. Synimi është që Shqipëria të mos ndjehet se këtë situatë do e kalojë vetëm. Kemi një angazhim të fortë e solid për të bërë gjithçka që është e mundur në këtë situatë të vështirë”, deklaroi komisioneri europian.
Ndërkohë, Rama teksa prezantoi edhe kategoritë më emergjente që sipas tij duhet të ndërhyhet së pari, kreu i qeverisë tha se në muain janar qytetarët e prekur nga tërmeti do të transferohen nga hotelet, drejt apartamenteve me qira.
“Bregdeti ynë ka hotele shumë të mira, të cilët iu përgjigjën thirrjes së qeverisë, për të hapur dyert për të strehuar banorët e prekur nga tërmeti. Dielli ka dalë vërtetë, por njerëzit do fillojnë të kërkojnë ato gjëra që janë bazike. Ka solidaritet. Trysnia është shumë e lartë. Por larg qoftë për një fatkeqësi tjetër, sa të përgatitur do jemi, jo vetëm për dëmet fizike, por edhe për fondet..Ne nuk duhet të lëmë mënjanë një gjë që të hapim diku tjetër. Ne kemi bërë sa më shumë që kishim mundësi. Kategoria e parë që është më urgjente, janë ato që duhet të shkatërrohen. Kjo është një krizë e thellë në fakt, por duhet të shohim oportunitetet, që mos të përgatisim gabimet e së shkuarës, që pas gjithë kësaj gjëje ata të kenë një shtëpi më të mirë se në të shkuarën. Kemi identifikuar një zonë në Durrës që të ndërtojmë një lagje të re, për të çliruar qytetin, duke hapur hapësirat publike, për të ndërtuar kopshte, çerdhe, apo shkolla. Nuk duhet të ndërpresim jetën e njerëzve. Kategoria e dytë, ajo që ka të bëjë me ndërtesat që nuk janë të dëmtuara nga aspektet strukturore, por flasim për një punë masive, pasi ndonjëherë duhen referuar më shumë. Kategoria e tretë janë zonat rurale, ku ka shtëpi të tilla. Është e vështirë, komplekse, edhe për rindërtimin. Në zonën rurale ka një zonë të caktuar ku duhet të ndërtosh. Në infrastrukturën e urave nuk kemi dëme, shyqyr Zotit s’kemi dëme të rënda. Nuk ka një infrastrukturë publike dhe rrugore të dëmtuar. Jemi mirë me këtë pjesë. Kemi shumë shkolla, që disa prej tyre duhen shembur dhe disa duhen rregulluar. Kemi 21 institucione shëndetësore, që nuk kanë marrë dëmtime në strukturë. Ne si fillim do përqendrohemi tek shkollat dhe banesat”, -tha Rama./ Opinion.al
