Ministrja e Arsimit, Besa Shahini në mbledhjen e jashtëzakonshme të qeverisë ka bërë një bilanc të objekteve shkollore të dëmtuara në Durrës, Tiranë, Lezhë dhe Elbasan.
Në fjalën e saj, Shahini tha se janë në totale 52 objekte shkollore ku nuk mund te kryhet mësim, përfshirë edhe kopshte.
Po ashtu, ajo deklaroi se ende nuk është marrë një vendim nëse do rifillojë mësimi të hënën apo jo.
Gjatë mbledhjes së jashtëzakonshme, Shahini parashtroi dy opsione, duke thënë sse duhet pezullohet mësimi vetëm në qytetet ku është shpallur gjendja e jashtëzakonshme ose vetëm në shkollat ku ka pasur dëmtime.
“Në qarkun e Durrësit janë 16 objekte shkollore dhe kopshte që janë të dëmtuara rëndë ose lehtë por që këto të fundit kanë nevojë port riparime dhe nuk mund të hapen. Në qarkun Tiranë 23 shkolla të dëmtuara më rëndë apo pak më lehtë që nuk mund të rihapen menjëherë. Në qarkun Lezhë janë 10 shkolla të dëmtuara, 3 të dëmtuara rëndë dhe 7 më lehtë por nuk mund të rilahen menjëherë. Në qarkun Elbasan kemi edhe 3 shkolla të tjera të cilat kanë të dëmtuara më rëndë apo më lehtë që gjithashtu nuk mund të rihapen menjëherë. Dëmtimet më Tiranë, Lezhë dhe Elbasan nuk janë të nivelit në Durrës por sidoqoftë ka nevojë për kohë për riparim, ka dhjetëra shkolla të tjera me dëmtime të lehta si plasaritje suvaje, nuk paraqesin rrezik për nxënësit. Nuk mendoj që në Durrës përkundër masave që kemi marrë është koha që të fillojmë mësimin të hënën. Mendoj që Tirana, Lezha dhe qarqet kanë nevojë për pak kohë që të bëhen riparimet e nevojshme që të hapen shkollat dhe rifillojë mësimi. Kemi dy opsione, që të rifillojë mësimi në të gjitha qarqet e paprekura, pasi kemi nevojë të fillojmë procesin e normalizimit dhe të bëjmë një shtyrje të rifillimit të mësimit në zonat ku kemi shpallur gjendjen e jashtëzakonshme. Një opsion i dytë më pak i preferuar nga ana jonë është që të mos fillojë mësimi vetëm në qarkun Durrës ndërsa në qarqet Tiranë, Lezhë të mos fillojë mësimi vetëm në shkollat e identifikuara me probleme. Por mendoj se kjo do paraqesë një çakordim të punës në këto qarqe. Duhet të marrim një vendim si kabinet,”-tha Shahini./ Opinion.al
