Deputetja Albulena Haxhiu, e dorëhequr nga Lëvizja Vetëvendosje, në një lidhje telefonike për Ora News, e konsideroi akt tradhtie marrëveshjen për ndarjen e kufirit me Malin e Zi, duke paralajmëruar se miratimi i saj dje nga Parlamenti i Kosovës do të dërgohet në Gjykatën Kushtetuese.
Haxhiu: Ajo që ka ndodhur mbrëmë në Kuvendin e Kosovës është e dhimbshme, ku deputetët legjitimuan aktin e tradhtisë të bërë nga Presidenti aktual, në atë kohë ministër i Punëve të Jashtme. Kemi debatuar gjatë në Kuvend, bazuar mbi fakte por edhe mbi raportin e komisionit aktual që ka ekspertë të fushës për këtë çështje. Janë paraqitur 64 harta ku dëshmohet që Kosova ka humbur territor me Malin e Zi. Argumentet tona nuk bënë punë. Andej, dje kemi bërë përpjekje maksimale për ta ndalur ratifikimin e kësaj marrëveshje. Këtë marrëveshje do ta dërgojmë në Gjykatën Kushtetuese për shkak se dje me votën e deputetëve është cenuar rëndë integriteti territorial, një prej elementëve të shtetit. Jemi duke përgatitur lëndën për ta dërguar në Gjykatën Kushtetuese.
