Delegacioni i lartë i Kongresit të Autoriteteve Lokale të Këshillit të Europës ka mbërritur sot në Tiranë në një vizitë zyrtare.
Në orën 10:00 ata zhvilluan një takim me presidentin Ilir Meta. Sipas njoftimi të presidencës, delegacioni i KiE është në Shqipëri në një mision fakt-mbledhës në lidhje me zgjedhjet lokale të 30 qershorit.
Kujtojmë se ky institucion i lartë refuzoi të marrë pjesë në monitorimin e zgjedhjeve.
Delegacioni përbëhet nga niveli më i lartë i përfaqësimit të Kongresit me Presidentin z.Anders Knape, me Presidentët e dy Dhomave, të Autoriteteve Lokale, z.Xavier Cadoret, dhe të Rajoneve znj.Gunn Marit Helgesen, si dhe me Sekretarin e Përgjithshëm z.Andreas Kiefer.
Vizita e tyre në Tiranë vjen pas evidentimit të një numri kryebashkiakësh të cilët kanë rezultuar se kanë bërë deklarime të rreme në formularin e dekriminalizimit. Në axhendën e delegacionit është parashikuar takimi edhe me kreun e opozitës, Lulzim Basha dhe me ambasadoren amerikane, Yuri Kim.
Presidenti Meta theksoi se Shqipëria ndodhet në një krizë sui generis përfaqësimi, dhe në çeikulibër të plotë të mekanzimave të kontrollit dhe balances: “Votimet njëpartiake të 30 qershorit nuk i dhanë zgjidhje krizës, por cënuan rëndë edhe demokracinë vendore, duke e zhytur më shumë vendin në rrugën e paligjshmërisë dhe kapjes së shtetit”.
Kreu i Shtetit u ndal edhe në disa ligje të miratuara nga Kuvendi, të cilat, sipas tij, cenojnë autonominë vendore dhe disa parime bazë të Kartës Europiane, të cilat pritet të shqyrtohen nga Gjykata Kushtetuese, ende jofunksionale.
Kushtet e Bundestagut, vuri në dukje Presidenti Meta, janë pasqyra më e qartë e problemeve serioze me të cilat përballet vendi, por edhe harta më e sigurtë për rrugën europiane që duhet të ndjekë pa vonesë Shqipëria.
Presidenti theksoi se është jetike për të ardhmen e qytetarëve shqiptarë që kësaj situate t’i jepet një zgjidhje tërësore, duke i kthyer legjitimitetin e munguar institucioneve përmes votës së lirë të qytetarëve. /Opinion.al
