Tvklan ka siguruar një tjetër video nga momenti i atentatit ndaj Klaudio Prendit.
Nga pamjet që duken më qartë, pasi ka lënë ambientet e lokalit ku po qëndronte, Prendi i është drejtuar mjetit të tij “Mercedes-Benz G-Class”. Sapo ai ka mbyllur derën e shoferit, në kamera shfaqet makina “Audi” e autorëve që besohet se zbriti nga zona e Freskut.
Ndërkohë në një tjetër video të publikuar më herët, pas makinës së Prendit ka qenë një mjet tjetër që ka lëvizur me shpejtësi mbrapsht sapo shoferi ka parë të shtënat. E nga aty autorët lëvizin me shpejtësi më pas në drejtim për nga qendra.
Ata e kanë çuar mjetin në Farkë, aty ku e kanë djegur tërësisht. Policisë iu desh ta kontrollonin dy herë për të gjetur aty armën e krimit, një pistoletë, e cila ishte plotësisht e djegur.
Policia e Tiranës po heton në disa pista pas vrasjes së Klaudio Prendit. Një ndër më të besueshmet është konflikti që 27-vjeçari ka pasur kohët e fundit.
Mësohet se i riu ka pasur një shumë rreth 15 mijë Euro për të kthyer dhe për këtë arsye dyshohet se është konfliktuar me grushte pak ditë më parë.
Babai i viktimës, ish-gjyqtari Fran Prendi, në dëshminë e tij ka thënë që ishte në dijeni që djali i tij kishte konflikte me të tjerë, por nuk e mendonte sa do të përfundonte deri në atentat.
Policia është në kërkim të autorëve që kryen krimin e rëndë.
