Organizata për të drejtat e njeriut, Amnesty International, njoftoi se numri i ekzekutimeve në të gjithë botën ka shënuar rënie.
Kështu, ekzekutimet e konfirmuara globale kanë rënë për të katërtin vit radhazi, përkatësisht në 657 ose 5 për qind më pak se në vitin 2018.
Organizata tha se kjo është shifra më e ulët e regjistruar gjatë dekadës së kaluar por raporti nuk e përfshin Kinën, ku numri i ekzekutimeve, është sekret shtetëror.
Raporti po ashtu thekson se edhe vendet e tjera, si Koreja e Veriut dhe Vietnami, fshehin numrin e saktë të ekzekutimeve, duke kufizuar qasjen në informacion.
Sakaq, Arabia Saudite ka ekzekutuar 184 persona në vitin 2019, shifër rekord për këtë vend. Në raportin e publikuar thuhet se ekzekutimet në Irak janë dyfishuar vitin e kaluar në njëqind, ndërsa Irani mbetet ekzekutuesi i dytë më i madh pas Kinës, me 251 raste.
“Dënimi me vdekje është një ndëshkim çnjerëzor dhe nuk ka asnjë provë të besueshme se e ndalon krimin më shumë sesa burgimi”, tha Clare Algar, drejtoreshë e hulumtimeve pranë organizatës Amnesty International./Opinion.al
