Lideri demokrat Lulzim Basha takoi sot ambasadorin amerikan Donald Lu direkt pasi ky i fundit foli për çështjen Tahiri dhe Kryeministri Edi Rama e vendosi deklaratën e Lu në favorin e tij.
Lulzim Basha tha pas takimit se “SHBA kanë folur qartë dhe i ka dhënë mbështetje gjykatësve dhe prokurorëve. Qëndrimi i Ramës është i dëshpëruar dhe kërkon të kapet pas fijes së kashtës. Rama refuzon të bëhet pjesë e zgjidhjes dhe është pjesë e problemeve. Saimir Tahiri është vetëm njëra hallkë e narko-shtetit, ndërsa hallkat e tjera janë Arben Ndoka, Armando Prenga, Elvis Roshi dhe Vangjush Dako”, tha Basha.
Kësisoj ai nxjerr në skenë për herë të parë emrin e kryetarit të Bashkisë së Durrësit, Vangjush Dako i palakuar më parë për përfshirje në afera kriminale. Nuk dihet ende se për cfarë e ka fjalën Basha kur thotë se Dako është pjesë e hallkës së Tahirit.
Pak ditë më parë gazetari Blendi Fevziu shkruante: “Në redaksi portalesh kanë qarkulluar fotot të një tjetër ministri të qeverisë në shoqërinë e një njeriu të Habilajve gjatë fushatës në Vlorë. Edhe pse në një drekë disi të gjerë. Qarkullojnë përgjime të një kryetari bashkie të rëndësishëm me eksponentë të njohur të botës së krimit, një dosje që implikon të afërmin e një Ministri, raporti i një shërbimi perëndimor për klanet dhe familjet mafioze në Shqipëri si dhe një dosje e rëndësishme korrupsioni që me gjasë do të vihet në lëvizje edhe nga organet e hetimit shumë shpejt!”
/Opinion.al
