Një ekip special i policisë shqiptare raportohet se ka mbërritur në Stamboll për të marrë informacione të detajuara mbi ‘baronin e drogës’, Met Kanani ose siç quhet nga media turke “Met Shqiptari”.
Sipas “HaberTurk” ekipi i policisë shqiptare ka mbërritur në metropolin turk ditën e premte, ndërsa paraditen e së hënës Kanani sëbashku me 10 të dyshuarit e bandës së tij u paraqitën para një gjykate në Stamboll.
Me 20 Mars, Met Kanani ishte kapur sëbashku me 10 persona të tjerë në Mugla, pasi nga maja e një kodre po shikonte mbërritjen në portin turk të një anijeje me 1.1 ton kanabis.
Policia e Stambollit, pas një hetimi 6-mujor, nisi aksionin për arrestimin e trafikantëve duke vënë në pranga 11 persona, 4 prej të cilëve shqiptarë. Droga e sekuestruar kapte vlerën e mbi 5 milionë eurove.
Kanani raportohet se i kishte ikur policisë greke, e cila kishte kapur disa prej pjesëtarëve të bandës së tij pas një operacioni në det me ndihmën e helikopterëve, vitin e kaluar. Trafikantëve iu gjet 1.3 tonë drogë në gomonen e kapur në det pasi kishte përfunduar karburanti.
